Aðventumót Krulludeildar 1.-15. desember

Í fyrsta lagi ber að nefna að mótið hefst 1. desember og verður leikið meðfram Bikarmóti Krulludeildar að hluta, þannig að þeir einstaklingar sem ná lengst í Bikarmótinu fá færri tækifæri til að safna stigum í Aðventumótinu, en um leið fá þeir sem falla úr leik í Bikarmótinu áfram tækifæri til að taka þátt í keppni. Leikdagar Aðventumótsins verða 1., 8., 13., og 15. desember (leikdagar Bikarmótsins eru 6., 8. og 13. desember).

Reglur mótsins verða sem hér segir:

• Aðventumótið er einstaklingskeppni, þannig að hver leikmaður fær í hvert skipti þau stig sem hans lið ávinnur sér.
• Hver leikur er þrjár umferðir, jafntefli eru leyfð. 
• Kastað er upp á hvort liðið hefur val um síðasta stein í upphafi leiks.
  
• Leiknir eru tveir leikir hvert keppniskvöld. 
• Gefin eru 10 stig fyrir sigur, 5 stig fyrir jafntefli, 2 stig fyrir hverja unna umferð og 1 stig fyrir hvern skoraðan stein.
• Fyrir fyrstu umferð er dregið saman í lið, 3-4 í liði eftir því hve margir mæta til leiks. Liðsmenn koma sér sjálfir saman um röð leikmanna í leik.
• Fyrir aðrar umferðir er þátttakendum raðað í hópa eftir stöðunni og síðan dregið saman í lið, t.d. þannig að ef sextán leikmenn taka þátt (fjögur lið) eru fjórir efstu í einum hópi og geta ekki lent saman í liði, fjórir næstu eru saman í hópi og geta ekki lent saman í liði o.s.frv. Fjöldi hópa og fjöldi í hóp markast af fjölda þátttakenda og liða hverju sinni. 
• Fjögur bestu skor hvers þátttakanda gilda þegar upp er staðið.
• Verði leikmenn jafnir að stigum miðað við fjögur bestu skor er fimmta besta skori bætt við og svo framvegis þar til sigurvegari fæst.