Birna Baldursdóttir íshokkíkona SA 2016

Birna Baldursdóttir hefur verið valin íshokkíkona Skautafélags Akureyrar árið 2016.

Birna er framherji og spilaði stórt hlutverk í liði Ásynja sem varð bæði deildar- og Íslandsmeistari á síðastliðnu keppnistímabili. Hún er markahæsti leikmaður Ásynja á líðandi tímabili með 7 mörk eftir 5 leiki. Birna var einnig lykil leikmaður í kvennalandsliði Íslands sem keppti á heimsmeistaramótinu á Spáni og landaði í 3.sæti í vor. Birna hefur alls unnið 11 Íslandsmeistaratitla með SA.

Birna hefur spilað íshokkí síðan árið 1999 og hefur alla tíð verið með mikla líkamlega yfirburði í deildinni og verið með gott markanef. Birna er gríðarlega reynslumikill leikmaður sem hefur spilað 16 tímabil með SA og farið á 7 heimsmeistaramót með kvennalandsliði Íslands. Birna tók þátt í fyrsta heimsmeistaramótinu sem kvennalandsliðið tók þátt í í Nýja-Sjálandi árið 2005 en einnig HM í Rúmeníu árið 2008 þegar liðið vann til gullverðlauna. Birna var valinn íshokkíkona ársins af ÍHÍ árið 2005.

Birna er mikil íþróttakona og hin fullkomna fyrirmynd fyrir upprenandi íshokkíleikmenn. Hún hugsar vel um líkama sinn og passar uppá að mætaræði, æfingar og andlegur undirbúningur seú til þess fallinn að hún geti ávallt æft og keppt á afrekssviðinu. Birna er einn besti leikmaður deildarinnar og landsliðs Íslands þrátt fyrir að vera einnig elsti leikmaður deildarinnar.

Birna er einnig frábær í hóp og mikil liðsmanneskja. Hún leiðir liðin sín á öllum sviðum leiksins. Hún gefur mikið af sér til yngri leikmanna bæði sem fyrirmynd en ekki síður sem kennari þar sem hún hjálpar öðrum leikmönnum með æfingar og mataræði en Birna er menntaður íþróttakennari. Birna er ekki bara frábær leikmaður heldur einnig ómetanleg manneskja fyrir Skautafélag Akureyrar að hafa í sínum röðum og ekki síður fyrir allt kvennaíshokkí á Íslandi. 

Við óskum Birnu innilega til hamingju með nafnbótina.

Birna Baldursdóttir tekur við viðurkenningunni frá Ólöfi Björk Sigurðardóttur. (mynd: Ásgrímur Ágústsson)