Kvennaleikur á morgun, yngri gegn eldri

Á morgun þriðjudag kl. 19:00 mætast yngra og elda kvennalið SA í Skautahöllinni á Akureyri.  Liðin hafa mæst fjórum sinnum í vetur og hafa þær eldri borið sigur úr býtum í þrjú skipti en þær yngri höfðu sigur í vítakeppni í einni viðureigninni.  Þær eldri eru með 13 stig eftir 8 leiki en þær yngri eru með 3 stig eftir 8 leiki.

Þó er óhætt að segja að þær yngri hafi komið á óvart í vetur því fyrirfram var ekki gert ráð fyrir því að þær gætu velgt hinum eldri í SA og Birninum undir uggum, en þær hafa þó krækt í jafntefli eftir venjulegan leiktíma gegn báðum liðunum.  Þar að auki má sjá stöðugar framfarir hjá liðinu og munurinn á þeim og hinum liðunum minnkar jafnt og þétt.

Það er því á þessu stigi nokkuð ljóst að það verða þær eldri sem munu tryggja sér sæti í úrslitum, en regluverkið heimilar engu að síður sameiningu SA-liðanna í úrslitakeppni.  Björninn hefur þegar tryggt sér heimaleikjaréttinn en liðið hefur 7 stiga forskot í deildinni með 20 stig eftir 8 leiki, eða 4 umferðir.

Þrátt fyrir að um innanfélagsleik sé að ræða þá eru þessar viðureignir engu að síður skemmtilegar og nauðsynlegur liður í undirbúningi liðsins fyrir komandi átök í úrslitum.  Áhugafólk um íshokkí er því eindregið hvatt til að kíkja í Skautahöllina á morgun og hrópa ÁFRAM SA!