Eins marks tap gegn Króatíu

Mynd: ÍHÍ

Íslenska kvennalandsliðið tapaði með eins marks mun gegn Króatíu á HM í morgun. Sarah Smiley getur ekki hætt að skora.

Króatíska liðið komst í 2-0 í fyrsta leikhluta og svo 3-0 í öðrum áður en Sarah Smiley og Steinunn Sigurgeirsdóttir minnkuðu muninn í 3-2, en aftur komu tvö króatísk mörk og staðan 5-2 í lok annars leikhluta. Sarah Smiley minnkaði muninn í 5-3 í upphafi þriðja leikhluta og aftur skömmu síðar, en þar við sat og Króatar sigruðu með einu marki og geta væntanlega þakkað það góðri byrjun liðsins.

Það voru Sarah Smiley og Steinunn Erla Sigurgeirsdóttir sem sáu um markaskorun og stoðsendingar íslenska liðsins í dag.

Mörk/stoðsendingar
Sarah Smiley 3/1
Steinunn Erla Sigurgeirsdóttir 1/1
Varin skot: 34
Refsingar: 16 mínútur

Króatíska liðið fékk 10 mínútur í refsingar. Markvörður þeirra varði 22 skot.

Nánari upplýsingar um mótið má finna á heimasíðu mótshaldara, þar sem meðal annars er bein atvikalýsing og svo leikskýrslan sjálf.

Þriðji leikur liðsins verður gegn Suður-Kóreu á morgun, fimmtudag, og hefst hann kl. 14.30 að íslenskum tíma.

Og Lars fór með liðið í gönguferð
Á vef ÍHÍ er dagbók fararstjóra og þar er meðal annars þessi skemmtilega klausa: "Eftir hádegismat fór allur hópurinn í gönguferð í bæinn, tímasetning sérstaklega valin af eina karlmanni hópsins en það var einmitt Siesta og allar búðir lokaðar nema apótek og matvörubúð ;-) Þannig náðist hópurinn fljótt og vel saman aftur og haldið var upp á hótel í hvíld."

Lars veit hvað hann syngur.