U18 landslið kvenna vann til silfurverðlauna á HM

Íslenska U18 liðið í íshokkí 2025

U18 kvennalandslið Íslands vann silfurverðlaun á HM í 2. deild B en liðið mátti sæta 0-2 tapi gegn Tyrkjum í hreinum úrslitaleik um gullverðlaunin.  Lokaleikurinn var mjög jafn en íslenska liðinu tókst hreinlega ekki að brjótast í gegnum Tyrkneska múrinn sem var hvattur áfram af stútfullri höll í Istanbúl og eflaust mikil upplifun fyrir okkar ungu stelpur en ekki alveg umhverfi sem liðið á að venjast. Íslenska liðið lék við hvern sinn fingur í mótinu og sýndi frábæra frammistöðu og jafnaði sinn besta árangur frá síðasta ári. Úrslitin í lokaleiknum eru eðlilega ákveðið svekkelsi fyrir íslenska liðið sem skapaði langflest marktækifæri allra liða á mótinu og var einnig tölfræðilega með bestu vörnina. Við óskum liðinu til hamingju með árangurinn og frammistöðuna og ljóst að framtíðin er virkilega björt.