Valkyrjur unnu Björninn 5 - 0

14.11.2010

Anna, Birna og Sarah fagna marki. Ljósmynd Ásgrímur Ágústsson

Á laugardagskvöldið mættust Valkyrjur og Björninn en þetta var í annað skiptið sem liðin mætast í vetur. Valkyrjur komu vel stemmdar til leiks og fóru nokkuð létt með gestina, stjórnuðu leiknum frá upphafi og hleyptu Birninum aldrei inn í leikinn. Fyrsta lotan fór 2 – 0 og mörkin skoruðu þær Hrund Thorlacius og Kristín Björg Jónsdóttir. Í 2. lotu juku Valkyrjur muninn um eitt mark, eftir gott skot frá bláu línunni frá Önnu Sonju Ágústsdóttur í „power play“.

Í þriðju lotu héldu Valkyrjur áfram öflugum sóknarleik og þær Díana Mjöll Björgvinsdóttir og þjálfarinn Sarah Smiley bættu við tveimur mörkum og gulltryggðu auðveldan 5 – 0 sigur. Markið frá Söruh kom þegar Valkyrjur voru einum leikmanni færri, en það er alltaf extra sætt.

Markmennirnir voru í lykilhlutverkum í leiknum. Karítas átti góða spretti í marki Bjarnarins og kom í veg fyrir enn stærri ósigur síns liðs en Valkyrjumegin var það nýliðinn Íris Hafberg sem átti stórleik og náði sér í sitt fyrsta „shut-out“, sem verður að teljast frábær árangur hjá leikmanni sem er að spila sitt fyrsta tímabil í Íslandsmóti.

Mörk og stoðsendingar Valkyrjur:

Hrund Thorlacius 1/1
Sarah Smiley 1/1
Anna S. Ágústsdóttir 1/1
Díana Mjöll Björgvinsdóttir 1/0
Birna Baldursdóttir 0/2
Katrín Hrund Ryan 0/1
Guðrún Arngrímsdóttir 0/1

Brottvísanir Valkyrjur: 12 mínútur.

Brottvísanir Björninn: 4 mínútur.

Aðaldómari var Jón Heiðar Rúnarsson og á línunni voru Dúi og Andri Már.

Til baka