Í ljósi aðstæðna eru komnar fleiri sprittstöðvar í Skautahöllinni. Þá er líka spritt við alla handvaska í húsinu. Við viljum því biðja iðkenndur og gesti um að muna eftir við handþvotti og sótthreinsun. Við þrífum og sótthreinsum alla helstu snertifleti í okkar daglegu þrifum. Opnunartímar almennings og æfingar iðkennda verða með hefðbundnum hætti um helgina.

Íslandsmótið 2020 hefst mánudaginn 9. mars.

Íshokkídeild Fjölnis hefur gefið alla leikina sem þeir áttu að spila á Akureyri um helgina. Það verður því engin leikur í Hertz-deildinni hjá SA Víkingum í kvöld né tvíhöfði í U18 sem áttu að spilast á laugardag og sunnudag.

Aldís Kara Bergsdóttir hefur keppni í lishtlaupi á morgun á Heimsmeistaramóti unglinga sem fram fer í Tallinn í Eistlandi. Aldís Kara verður þá fyrsti Íslenski skautarinn sem keppir á stóra sviðinu. Aldís hefur nú verið í undirbúningi fyrir mótið í Tallinn síðan á mánudag með fylgdarliði sínu og hefur undirbúningurinn gengið vel. Skautasamband Íslands heldur út daglegum fréttum af gangi mála á facebook síðu sinni sem er fróðlegt að fylgjast með. Aldís hefur keppni á morgun, föstudag kl. 11.20 á íslenskum tíma og má fylgjast með beinni útsendingu á youtube rás ISU.

SA Víkingar taka á móti Birninum/Fjölni í toppslag Hertz-deildarinnar laugardaginn 7. mars kl. 16:45 í Skautahöllinni á Akureyri. Víkingar og Björninn mætast í úrslitakeppninni sem hefst í lok mars en þetta er í síðasta sinn sem þessi lið mætast fyrir úrslitakeppnina. Ljóst er að bæði lið vilja setja tóninn fyrir hvað koma skal. Ungt lið SA Víkinga þarf allann þann stuðning sem stúkan getur veitt. Aðgangseyrir 1000 kr. og frítt fyrir 16. ára og yngri. Sjáumst í Skauthöllinni á laugardag!

Úrslitin ráðast í kvöld.

Síðasti leikur mótisins var annar auðveldur sigur Íslands og í þetta skiptið gegn Úkraínu. Leiknum lauk 6 - 0 og var aldrei í hættu. Ísland endaði í öðru sæti, Ástralía í því fyrsta og Nýja Sjáland í þriðja. Segja má að þetta hafi verið heldur sérkennilegt mót. Eitt tap á móti Ástralíu í fyrsta leik og svo fjórir til þess að gera auðveldir sigrar, en marka hlutfallið í síðustu fjórum leikjunum var 23 á móti 1. Það er alveg ljóst að íslenska liðið á heima í deildinni fyrir ofan og verður það markmið næsta móts.

Í dag er síðasti dagur Heimsmeistaramótsins í íshokkí, II deild b-riðill, sem fram fer í hér í Skautahöllinni á Akureyri. Leik Tyrklands og Króatíu var að ljúka með 5 - 2 sigri Tyrkja og núna kl. 13:30 hefst grannaslagurinn hjá Áströlum og Nýsjálendingum. Kl 17:00 er svo lokaleikur mótsins þegar Ísland tekur á móti Úkraínu. Leikurinn hefur ekki mikið að segja um loka niðurstöðu mótsins, en Úkraína berst þar fyrir veru sinni í riðlinum. Úkraína er aðeins með tvö stig eftir tvö jafntefli og fellur þá niður um deild eftir tap gegn Íslandi. Ísland er hins vegar annað hvort í 2. eða 3. sæti, eftir því hvernig leikar fara hjá Ástralíu og Nýja Sjálandi, að því gefnu að við vinnum Úkraínu auðvitað.

Á fimmtudagskvöldið mætti íslenska liðið því króatíska og lauk leiknum með nokkuð auðveldum 7 - 0 sigri. Var þarna um að ræða leik kattarins að músinni og gestirnir sáu aldrei til sólar. Karitas Halldórsdóttir snéri aftur í markið og fór létt með að halda hreinu. Mörk Íslands skoruðu 7 leikmenn en það voru þær Kolbrún Garðarsdóttir, Sunna Björgvinsdóttir, Hilma Bergsdóttir, Silvía Björgvinsdóttir, Sarah Smiley, Kristín Ingadóttir og Sigrún Árnadóttir. Stoðsendingar áttu Berglind Leifsdóttir, Silvía Björgvinsdóttir, Teresa Snorradóttir, Brynhildur Hjaltisted, Guðrún Viðarsdóttir, Flosrún Jóhannesdóttir, Anna Sonja Ágústsdóttir og Elín Axelsdóttir.

Í gærkvöldi tók Ísland á móti Tyrklandi hér í Skautahölllinni á Akureyri og það er skemmst frá því að segja að leikurinn var næsta auðveldur, lokastaðan 6 - 0. Íslenska liðið spilaði vel og átti alltaf svar við því sem Tyrkirnir buðu uppá. Birta Helgudóttur skellt í lás og hélt markinu hreinu þá er víst ekki hægt að tapa leik. Silvía Björgvinsdóttir hélt uppteknum hætti í framlínunni og setti þrennu, Sunna Björgvinsdóttir og Teresa Snorradóttir skoruðu einnig og svo var það Hilma Bóel Bergsdóttir, yngsti leikmaður liðsins sem skoraði sitt fyrsta landsliðmark. Stoðsendingar áttu Saga Blöndal, Silvía Björgvinsdóttir, Brynhildur Hjaltisted, Guðrún Viðarsdóttir og Herborg Geirsdóttir.