Af óviðráðanlegum orsökum fellur skautafjörið niður sem átti að vera í kvöld.

Á morgun kl. 14:00 mætast SA og Björninn í þriðju viðureign liðanna um Íslandsmeistaratitilinn 2010.  Leikurinn fer fram í Egilhöllinni í Grafarvogi og aldrei þessu vant þá verður leikurinn sýndur beint á RÚV.  Það verður án efa mikil stemning í höllinni því gera má ráð fyrir því að stuðningsmenn Bjarnarins reyni að fylla húsið enda glórulaust að gera eitthvað annað á sunnudegi kl. 14:00 en að mæta á hokkíleik.

Nú er tveimur leikjum lokið í úrslitakeppni karla í íshokkí og er staðan í viðureignum 1 - 1.  Fyrsti leikurinn fór fram á fimmtudaginn og lauk honum með sigri Bjarnarins 4 - 1.  Björninn fór betur af stað í upphafi leiks og hélt undirtökunum til leiksloka.  Við áttum þungar sóknir, nokkur stangarskot og oft munaði mjög litlu að pökkurinn færi inn en heppnin var ekki með okkur að þessu sinni.  Eina mark okkar skoraði Jón Gíslason eftir skot frá bláu frá Josh Gribben.