Íshokkítímabilið hefst formlega um helgina með opnunarleik Hertz-deildar kvenna þegar SA tekur á móti Fjölni í skautahöllinni á laugardag. Liðið okkar hefur tekið miklum breytingum í sumar en liðið missti sjö landsliðsleikmenn þar sem Herborg, Gunnborg, Katrín og Inga hafa allar gengið til liðs við félagslið í Svíþjóð og Danmörku. Saga Blöndal samdi við Skautafélag Reykjavíkur og Berglind og Hilma við Fjölni. Á móti hefur Silvía Rán Björgvinsdóttir komið aftur heim í SA og mun ekki bara spila heldur mun hún líka þjálfa liðið. Þá er Arndís Eggerz Sigurðardóttir komin tilbaka eftir barneignir en að öðru leyti er hópurinn óbreyttur frá síðasta tímabili og ljóst að margar ungar íshokkíkonur munu fá mun stærri hlutverk í vetur. Það mun eflaust taka einhvern tíma fyrir liðið að mótast eftir jafn miklar breytingar og orðið hafa í sumar en liðið er þrátt fyrir virkilega sterkt með margar reynslumiklar landsliðskonur innanborðs, Shawlee Gaudreault í markinu og stóran hóp efnilegra leikmanna sem verður spennandi að fylgjast með blómstra í vetur.

Silvía Rán Björgvinsdóttir, fyrirliði íslenska kvennalandsliðsins í íshokkí, er komin heim og mun spila fyrir SA í vetur. Silvía er að snúa til baka úr erfiðum meiðslum sem hún hlaut síðasta vetur og hafa haldið henni af ísnum en ætlar sér að koma sér aftur á strik og taka slaginn í Hertz-deildinni með SA og kemur einnig inn í þjálfarateymi SA.

Það var sannarlega kátt í skautahöllinni s.l. helgi og segja má að allt hafi iðað af lífi á ísnum sem utan hans þar sem bæði A landslið og U18 landslið kvenna komu saman í fyrstu æfingabúðum tímabilsins. Kim McCullough aðalþjálfari U18 liðsins og aðstoðarþjálfari A liðsins var með liðunum og miðlaði af sinni miklu þekkingu og reynslu til leikmanna ásamt Jóni Gíslasyni aðalþjálfari A landsliðsins. Lögðu þau línurnar fyrir komandi tímabil og nutu liðsinnis þeirra Silvíu Björgvinsdóttur aðstoðarþjálfara U18 liðsins og Atla Sveinssonar þjálfara hjá SA.

Byrjendaæfingar fyrir 2017 og yngri kl 17:00 í dag. Allur búnaður á staðnum og öllum velkomið að koma prófa! Bara mæta 30 mín fyrir æfingu. Eldri árgöngum velkomið að mæta á æfingar og prófa með sínum árgangi en hafið samband við Söruh Smiley - hockeysmiley@gmail.com Hokkírútan fer af stað í næstu viku og sækir 2014, 2015 og 2016 árganga í alla skóla bæjarins.

Framkvæmdastjóri Íþróttabandalags Akureyrar, Helgi Rúnar Bragason, er látinn aðeins 47 ára gamall eftir hetjulega baráttu við krabbamein. Helgi Rúnar hefur gengt stöðu framkvæmdastjóra ÍBA í mars 2018 og gegndi hann stöðunni allt til hins síðasta.

Æfingar eru nú að hefjast aftur samkvæmt tímatöflu og starfsemi deilda félagsins er komin á fullt og framkvæmdir í húsinu á lokametrunum. Byrjendaæfingar í listhlaupi eru byrjaðar og eru á mánudögum og miðvikudögum kl. 16:00-17:30 en aðrar æfingar eru samkvæmt tímatöflu. Byrjendaæfingar í íshokkí hefjast á fimmtudag og verða alla þriðjudaga og fimmtudag kl. 17:00-17:45 og aðrar æfingar samkvæmt tímatöflu. Krulluæfingar hefjast í September og verða auglýstar sérstaklega á heimasíðu krulludeildar.

Þá erum við í hokkídeildinni búin að klára íshokkíveturinn með style! Við enduðum vetrarstarfið okkar með hinu skemmtilega vormóti sem við höldum alltaf í maí. Um er að ræða innanfélagsmót með 5 deildum, 17 lið í heildina fyrir krakka á aldrinum 4-16 ára. Mótinu lauk formlega með lokahófi á þriðjudaginn s.l. þar sem þátttakendur úr yngri flokkunum gæddu sér á grilluðum pylsum og allir fóru heim með viðurkenningar.

Minningarstund um Sergii sem starfað hefur sem þjálfari listskautadeildar í vetur en lést í síðustu viku verður haldin á fimmtudaginn 1. júní kl. 17:00 í fundarsal ÍBA í íþróttahöllinni. Séra Hildur Eir Bolladóttir mun stýra stundinni en Karen Halldórsdóttir flytur minningarorð og Ívar Helgason tónlistaratriði.

Skauta- og íshokkí leikjanámskeið fyrir börn fædd 2013-2017 verður haldið í tvö skipti í júní og kostar 9000 kr hvor vikan fyrir sig. Námskeiðin verða 12-16. júní og svo 19.-23. júní. Skráning er á Sportabler.com/shop/sa/ishokki. Námskeiðin eru frábært tækifæri fyrir bæði byrjendur sem og iðkendur til þess að skemmta sér í leikjum og fá skautakennslu í leiðinni. Námskeiðið fer fram í og við Skautahöllina. Það er hægt að velja á milli þess að vera í listskautum eða í fullum íshokkíbúnaði og er hægt að fá allan búnað lánaðan á staðnum. Sarah Smiley hefur yfirumsjón með námskeiðinu, hockeysmiley@gmail.com fyrir nánari upplýsingar.

Hokkídeild SA hélt árshátíð sína þann 4. maí s.l. Það voru 123 sem fögnuðu saman tímabilinu, leikmenn frá u14 og upp úr, foreldrar og félagsmenn. Árinu var fagnað með góðum mat frá Vitanum Mathúsi og skemmtilegum myndbrotum úr leikjum vetrarins voru sýnd. Að lokum var verðlaunaafhending til einstaklinga eins og sjá má hér að neðan. Við óskum verðlaunahöfum til hamingju og bíðum spennt eftir nýjum hokkívetri.