Global Girls Game fer fram um helgina en þá verða spilaðir íshokkíleikur kvenna um allann heim og í öllum heimsálfum. Öllum stelpum - óvönum sem vönum - gömlum sem ungum er boðið að koma og spila íshokkíleik saman í Skautahöllinni á Akureyri sunnudaginn 17. febrúar kl. 9.55. Endilega bjóðið vinum og fjölskyldumeðlimum að taka þátt í þessu en hægt er að fá allann búnað lánaðan fríkeypis fyrir viðburðinn. Global Girls Game

SA varð um helgina Íslandsmeistari í 4. flokki í bæði keppni A- og B- liða. Íslandsmótið er leikið í formi helgarmóta en liðin spila 12 leiki á tímabilinu en þetta er yngsti aldursflokkurinn þar sem keppt er til Íslandsmeistara. Bæði liðin unnu alla sína leiki í Íslandsmótinu og fengu Íslandsbikarinn afhentan í lok síðasta mótsins nú um helgina sem fram fór í Egilshöll. Til hamingju öll með frábæran árangur.

Kvennalið SA tryggði sér deildarmeistaratitlinn í Hertz-deild kvenna um helgina þegar liðið lagði Reykjavík að velli tvívegis með sömu markatölunni, 5-1. Liðið tryggði sér einnig með sigrinum heimaleikjaréttinn í úrslitakeppninni sem leikin verður í apríl. SA hefur farið taplaust í gegnum tímabilið en liðið hefur sigrað Reykjavík í öllum 8 leikjum vetrarins og 40 mörk í plús svo yfirburðir liðsins hafa verið miklir.

SA Víkingar tryggðu sér deildarmeistaratitilinn í Hertz-deild karla á laugardag þegar liðið lagði Björninn í framlengingu. SA Víkingar tryggðu sér einnig heimaleikjaréttinn í úrslitakeppninni sem hefst í mars en liðið hefur unnið 10 af 12 leikjum sínum í deildarkeppninni í vetur. Björninn og SR keppast nú um hvort liðið mætir Víkingum í úrslitakeppninni en hvort liðið á 3 leiki eftir en SA Víkingar 4.

Tvær umferðir búnar í Gimli Cup

Keppni sunnudagsins var mjög hörð og enduðu leikar þannig að Aldís Kara Bergsdóttir landaði silfrinu með nýju stigameti í Junior og nýju íslensku stigameti, en hún hlaut samanlagt 108.45 stig. Marta María Jóhannsdóttir landaði bronsinu með persónulegu stigameti, en hún hlaut samanlagt 107.12 stig

LSA stúlkur stóðu sig gríðalega vel og urðu til persónuleg met í báðum flokkunum sem við áttum keppendur í á laugardaginn. Júlía Rós Viðarsdóttir landaði silfri í Novice á nýju persónulegu meti og Marta María Jóhannsdóttir og Aldís Kara Bergsdóttir standa í öðru og þriðja sæti að loknum fyrri keppnisdegi.

REYKJAVIK INTERNATIONAL GAMES (RIG) 2019 - Keppni í listhlaupi hófst á föstudaginn 1. febrúar. RIG er stærsta mót vetrarins sem haldið er af Skautasambandi Íslands. Á þetta mót koma fjölmargir erlendir keppendur og í ár eru þátttakendur frá 14 löndum allsstaðar að úr heiminum, Azerbaijan, Ástralíu, Chines Taipei, Finnlandi, Frakklandi, Bretlandi, Grikklandi, Indónesíu, Ítalíu, Kasakstan, Noregi, Nýja-Sjálandi, Suður-Afríku, Sviss auk Íslands.

Frostmótið sem er íshokkímót yngstu iðkenndanna verður haldið hjá okkur í Skautahöllinni um helgina. Um 160 börn eru skráð til leiks og verður leikið á laugardag og sunnudag frá kl. 7.45. Dagskrá mótsins má finna hér. Leikið er í 4 flokkum, 5. 6. og 7. flokki ásamt krílaflokki. Við hvetjum alla sem hafa gaman af íshokkí til að mæta í stúkuna og sjá öll glæsilegu börninn okkar að leik.

SA Víkingar taka á móti Birninum í annað sinn í vikunni í Hertz-deild karla laugardaginn 2. febrúar kl. 19.30 í Skautahöllinni. Víkingar lögðu Björninn með 4 mörkum á þriðjudag og geta með sigri á laugardag tryggt sér deildarmeistaratitilinn. Björninn hinsvegar er í mikilli baráttu um sæti í úrslitakeppninni svo búast má við svakalegum leik. Við mælum með að mæta snemma í húsið til að missa ekki af inngangsatriði Víkinga og grípa kvöldverðin í húsinu en Lemon verður á svæðinu með besta bitann í bænum. Sjoppan verður einnig opin á sínum stað með kaffi og með því, aðgangseyrir 1000 kr. frítt fyrir 16 ára og yngri.