Það er stór hokkíhelgi hjá okkur um helgina þar sem SA Víkingar, U16 og kvennalið SA spila öll leiki á heimavelli. SA Víkingar taka á móti Birninum í toppslag Hertz-deildarinnar laugardaginn 25. janúar kl. 16:45 í Skautahöllinni á Akureyri. Víkingar og Björninn berjast nú á toppi deildarinnar en bæði lið eru með 18 stig. SA Víkingar tefla fram gríðarlega ungu og efnilegu liði í vetur þar sem allir leikmenn liðsins eru uppaldir í félaginu og þurfa nú nauðsynlega á stuðningi stúkunnar að halda. Aðgangseyrir 1000 kr. og frítt fyrir 16. ára og yngri. Kl. 19.30 á laugardag hefst svo leikur í U16 en þá leika SA og Björninn en liðin eru nú jöfn að stigum á toppi deildarinnar. Á sunnudag koma svo Reykjavíkur stúlkur í heimsókn og mæta SA kl. 16:45 en þetta er síðasti deildarleikur liðanna fyrir úrslitakeppnina sem hefst 4. febrúar. Það er frítt inn á leikinn. Njótið hokkíhelgarinnar!

Íslenska U20 landsliðið í íshokkí unnu gullið á HM í III deild í gær þegar liðið lagði Ástralíu sannfærandi að velli 4-1 í úrslitaleiknum. Íslenska liðið var klárlega betra liðið á vellinum og baráttan og sigurviljinn greinilega meiri. SA drengirnir þeir Heiðar Gauti Jóhannsson, Heiðar Örn Kristveigarsson og Axel Orongan skoruðu mörk Íslands í úrslitaleiknum og var Axel stigahæsti leikmaður mótsins með 16 stig. Axel var í lok móts valinn bæði besti leikmaður íslenska liðsins á mótinu og besti sóknarmaður mótsins. U-20 liðið fer upp um deild á næsta ári og spilar í deild IIA en það er í fyrst sinn síðan árið 2015. Glæsilegur árangur hjá þessu magnaða liði og ljóst að framtíðin er björt í íslensku íshokkí.

SA-stúlkur lögðu land undir fót í dag og léku gegn Reykjavík í skautahöllinni í Laugardal. Einhver vandkvæði voru á útsendingu á leiknum og byrjaði útsending ekki fyrr en annar leikhluti var byrjaður þannig að við sem heima sátum misstum af hluta leiksins. Þetta hefði átt að vera síðasti leikur deildarinnar en vegna veðurs var fyrri leiknum í tvíhöfða sem átti að vera um síðustu helgi frestað til næstu helgar, og seinni leikinn gáfu Reykjavíkurstúlkur. SA var því með 19 stig fyrir leikinn í kvöld en Reykjavík 5.

Aldís Kara Bergsdóttir er íþróttakona Akureyrar árið 2019. Það er í fyrsta sinn sem skautakona Skautafélagsins hlýtur þennan mikla heiður. Aldís Kara átti algjörlega magnað ár 2019 þar sem hún bætti nánast hvert einasta met sem hægt er að bæta í skautaíþróttinni og sýndi stökk element sem ekki hafa sést áður hjá íslenskum skautara.

Íþróttabandalag Akureyrar og Frístundaráð Akureyrar bjóða bæjarbúum til athafnar í Hofi miðvikudaginn 15. janúar nk. þar sem lýst verður kjöri íþróttakonu og íþróttakarls Akureyrar. Dagskráin verður með breyttu sniði í ár þó við höldum fast í grunngildi hátíðarinnar. Í ár veitir Afrekssjóður Akureyrar átta afreksíþróttaefnum sérstaka viðurkenningu úr sjóðnum. Loks verður kjöri fimm efstu til íþróttakonu og íþróttakarls Akureyrar 2019 gerð góð skil með viðurkenningum við hátíðlega athöfn. Dagskrá hefst kl. 17:30.

Aldís Kara Bergsdóttir og Hafþór Andri Sigrúnarson hafa hlotið nafnbótina íþróttakona og íþróttakarl SA fyrir árið 2019. Aldís Kara var valin bæði skautakona listhlaupadeildar á dögunum sem og skautakona ársins hjá Skautasambandi Íslands. Hafþór Andri var valinn íshokkímaður íshokkídeildar SA fyrir árið 2019. Þau eru tilnefnd af Skautafélaginu til íþróttafólks Akureyrar fyrir árið 2019 en kjörið fer fram miðvikudaginn 15. janúar kl. 17.30 í Hofi en öllum bæjarbúum er boðið í kjörið.

Íshokkílandslið U-20 hefur keppni í dag á heimsmeistaramótinu í 3. deild sem fram fer í Sófíu í Búlgaríu. Ísland mætir heimaliði Búlgaríu í fyrsta leik sínum en leikurinn hefst kl. 18.30 og er sýndur í beinni útseningu hér.

SA-stúlkur taka á móti Reykjavík í tvíhöfða um helgina. Fyrri leikurinn er á laugardag kl. 16:45 og sá síðari á sunnudaginn klukkan 9:00. SA er með 16 stig eftir 7 leiki spilaða en Reykavík 5. Það er frítt inn á leikina. Mætum og styðjum stelpurnar til sigurs!

Leik SA Víkinga og Bjarnarins sem fram átti að fara í kvöld hefur verið frestað vegna veðurs.