Freydís Jóna Jing Bergsveinsdóttir og Sædís Heba Guðmundsdóttir voru fulltrúar Skautafélags Akureyrar á Norðurlandamótinu á listskautum sem fór fram 1. - 4. febrúar í Borås, í Svíþjóð. Freydís Jóna náði 19. sæti í Junior flokki með heildarstig uppá 81.24 stig og Sædís Heba 15. sæti í Advanced Novice með 78.27 stig.

LEIKUR #3 í Úrslitakeppninni í Hertz-deild kvenna er á morgun fimmtudag kl. 19:30. Liðin hafa unnið sitthvorn heimaleikinn og ljóst að stuðningur stúkunnar getur riðið baggamuninn í þessarri rimmu. Við mælum með að mæta snemma til að ná góðu sæti en það verða einnig seldir hamborgarar fyrir leik í félagssalnum á 2. hæð. Mætum í rauðu málum stúkuna rauða og styðja okkar lið til sigurs. Miðaverð 2.000 kr. frítt inn fyrir 13 ára og yngri. Forsala Miða: https://stubb.is/events/ykO8ky Burger fyrir leik og í leikhéi á 2. hæð. Ásgarður sjoppan í Skautahöllinni Opin og samlokugrillið funheitt.

Úrslitakeppnin í Hertz-deild kvenna er að hefjast en fyrsti leikur er á á sunnudag, 25. febrúar kl. 16:45 í Skautahöllinni á Akureyri. SA mætir þar Fjölni en liðin voru efst í deildarkeppninni þar sem SA vann deildarmeistaratitilinn með 42 stig en Fjölnir var með 24 stig. Leikið verður sitt á hvað þar sem SA byrjar á heimavelli en vinna þarf þrjá leiki til þess að tryggja sér Íslandsmeistaratitilinn í íshokkí. Miðaverð er 2000 kr. en frítt inn fyrir 13 ára og yngri. Hægt er að tryggja sér miða í forsölu í Stubb. Við hvetjum fólk til þess að mæta í rauðu og litum þannig stúkuna í okkar lit. Sjoppan samlokur svo engin þarf að fara svangur heim. Áfram SA!

Öskudag diskóið sem haldið var á öskudag lukkaðist mjög vel og börnin fóru glöð heim. Dýrin í hálsaskógi kíktu í heimsókn, kötturinn var sleginn úr tunnunni og verðlaun voru veitt fyrir bestu búningana og allir gestir fengu eitthvað gott. Öskudagsballið er samtarf Skautahallarinnar og Listskautadeildar SA og Greifinn gaf verðlaun. Við þökkum gestum okkar á Öskudagsballinu kærlega fyrir komuna og vonum að allir hafi skemmt sér konunglega á þessum frábæra degi. 

Stjórn Skautafélags Akureyrar auglýsti eftir tillögum um nafn á nýja félagssalinn í Skautahöllinni og bárust 11 mismunandi tillögur að nafni á salinn. Stjórnin hefur nú valið þau 3 nöfn sem þykja álitlegust og bjóða nú fólki að kjósa um nafnið á salnum. Nöfnin sem kosið verður um: Skjaldborg - stofnstaður Skautafélags Akureyrar Miðgarður - Vísan í norræna goðafræði Krókeyrararstofa - Vísan í staðsetningu félagssvæðisins

U18 lið SA tryggði sér Íslandsmeistaratitilinn í gærkvöld þegar liðið lagði SR 11-1 í Laugardalnum. SA var að vinna sinn 7 leik í mótinu og ekki enþá tapað leik en SR og Fjölnir bæði búin að leika fleiri leiki og eiga ekki möguleika á að ná SA úr þessu. Frábær árangur hjá þessum samheldna hópi leikmanna sem spennandi verður að  fylgjast með á komandi árum.

Kjöri íþróttamanns Akureyrar 2023 var lýst á Íþróttahátíð Akureyrar á vegum Íþróttabandalags Akureyrar og fræðslu- og lýðheilsuráðs Akureyrarbæjar sem fram fór í Menningarhúsinu Hofi á miðvikudagskvöld. Íshokkíkappinn Jakob Ernfeldt Jóhannesson varð fimmti í kjörinu um íþróttakarl Akureyrar 2023. Hlauparinn Baldvin Þór Magnússon úr UFA er íþróttakarl Akureyrar 2023 og knattspyrnukonan Sandra María Jessen hjá Þór/KA er íþróttakona Akureyrar 2023. Í öðru sæti voru þau Hallgrímur Mar Steingrímsson knattspyrnumaður í KA og Helena Kristín Gunnarsdóttir blakkona í KA. Í þriðja sæti voru Alex Cambray Orrason lyftingamaður í KA og Hafdís Sigurðardóttir hjólreiðakona hjá HFA. 

SA liðin leika bæði heimaleiki við Fjölni í Hertz-deildunum á laugardag í Skautahöllinni á Akureyri. Fyrst taka SA Víkingar á móti Fjölni í Hertz-deild karla kl. 16:45 og stelpurnar í SA mæta Fjölni í Hertz-deild kvenna kl. 19:30. Miðaverð á leikina er 1500 kr. og frítt inn fyrir 16 ára og yngri en forsala miða er hafinn á Stubb. Foreldrafélag íshokkídeildar grillar hamborgara fyrir gesti í nýju félagsaðstöðunni á meðan birgðir endast en kveikt verður á grillinu frá kl. 15:30. Samlokugrillið í sjoppunni verður einnig funheitt svo engin ætti að verða svangur á leikjunum. 

Fimmtudaginn 25. janúar, fór fram afhending á styrkjum Norðurorku til samfélagsverkefna vegna ársins 2024 í Menningarhúsinu Hofi en þar fékk Skautafélag Akureyrar styrk. Eins og segir á heimasíðu Norðurorku þá bárust 100 umsóknir þar sem eftirtektarvert var hve fjölbreytni verkefnana var mikil sem lýsir vel þeirri grósku sem býr í samfélaginu okkar. Fjögurra manna vinnuhópur (skipaður starfsfólki NO) fór yfir umsóknirnar og varð niðurstaða hópsins að veita styrki til 38 verkefna. Verkefnið var erfitt enda fjölmörg góð verkefni sem sótt var um styrk til og ákveðin upphæð sem var til ráðstöfunar.

U20 ungmennalandslið Íslands í íshokkí náði sögulegum árangri um helgina þegar liðið vann bronsverðlaun á Heimsmeistaramótinu í II deild b sem fram fór í Pionir Arena í Belgrad í Serbíu. Ísland tryggði sér bronsið með því að leggja Chinese Tapei örugglega 9-4 í síðasta leik en áður hafði liðið unnið bæði Ástralíu og Belgíu. Rúmenía sem stal sigrinum gegn Íslandi í síðustu viku vann svo gullverðlaunin og fer upp um deild. Bronsverðlaunin eru besti árangur sem Ísland hefur náð í þessum aldursflokki á heimsmeistaramóti svo árangurinn er sögulegur merki um gæði nýrrar kynslóðar leikmann sem nú eru að koma upp í íslensku íshokkí. SA Víkingurinn Arnar Helgi Kristjánsson var valin besti varnarmaður mótsins en hann var stigahæsti leikmaður Íslands á mótinu með 9 stig (2+7) og þriðji stigahæsti leikmaður mótsins. Akureyringarnir Alex Máni Sveinsson, nú leikmaður Örnskoldsvik í sænsku 1. deildinnim, var markahæsti leikmaður Íslands í mótinu með 4 mörk (4+4) og Helgi Þór Ívarsson leikmaður var með þriðju hæst markvörsluhlutfall mótsins með 91,87% markvörslu.